دده قورقود مثنوی له ری ( اکبرزاده کهنه شهرلی) - فصل چهارم
بسم الله الرحمن الرحیم
دده قورقود
مثنوی له ری
جیلد 1و2
(بیرینجی دفه تورک ادبیاتیندا مثنوی شکلینده یازلیب )
محمد اکبرزاده
( ناصح کهنه شهرلی )
انشارات مهر امیر المؤمنین ( ع )
فصل چهارم
اولوتانری نین آدی هابئله یادیله
دده قورقود مثنوی له ری ... اون سوز (بیرینجی جیلر )
« اون سوز»
دده قور قود بوی ( ناغیل ) لاری مدنیت و دیل باخیشیندان تورک ائل لرینه أن بویوک هابئله ده یرلی قایناق و عبرت لی اورنک ساییلیر . دده قورقود کیتابینین یازماق تاریخی اورتا عصرلره یعنی اونونجو میلادی ایل لرینه تخمین وورولوبدور کیتابین اصلی سی روم موزه سینده ساخلانیر و کتابین عین متنی گریل الفباسیندا باکودا چاپا یئتیشیب.
و بویوک تدقیق چی آقای دوقتور محمدعلی فرزانه جنابلاری اونو عربی الفباسینه کوچوردوب کی ایران تورک لری اوندان فایدالانیب دئمه لییک دده قورقود ناغیل لاری اون ایکی ناغیل دان تشکیل تاپیبدیر بو اون ایکی ناغیل هر بیری مستقل ناغیل اولاراق ، اول ناغیل لاردا تورک لرین جوانمردلیق – أرنلیگی – منلیگی آیین – شایین تصویره چه کیلیبدیر دده قورقودون کیتابینی یازان بللی ده گیل ، دئمه لی دده قورقود بوکیتابا بیراوزان ( عاشیق ) شکلینده ظاهیر اولور و تورک ایل لرینین مشکل لرینی اوز آییق و باشاراجاقلی تدبیر یله حل ائدیب و تامام ناغیل لاردا بیر داهی عالم تکین دوزگون یولیله مسئله لری حل ائده رک اوز بیلدیگینی دوزراق تورک له رین بویوکلری نین خدمتینه سویلییه رک بیرتای سیزوزیر تک هیچ ادعا اوزونه متصور اولماییب . دده قورقودون ناغیل لاریندا تورک ائل له رینین ساده یاشاماقی – یابانچی لاراقارشی دورماق – دیندن صاحب اولماق – بویوک لرین سوزونه باخماق – دوزگون سوزو قبول ایله مک – مشکل لری شورایی شکل ده اوجورکی قرآن مجید ده وار حل ایله مک- ایگیدلیک – نامردلره قارشی دورماق – تورک ائل لری ائچون جاندان گئچمک –
ملعون یزیده امام حسین ( ع ) شیعه لرین امامینی شهید ایله مک اوچون نفرین ائله مک و تامام انسانی خصایص ده اولماق بیر پارلاق یاروق تک آراشدیر لانیب هر حالدا بعضی لر دده قورقود و رسول اکرم ( ص ) ایله هم عصر بولوبلر حقیرین نظرینه دوز اولا بیلمز چون کیتابین ایچینده یازماقلارا گوره و یزید ملعونا کیتابدا نفرین ایله مه یه گوره کیتاب هامان میلادی ایلی نین اونونجو عصر ینده یعنی اسلامی تاریخ ین اوچونجو عصرینده یازیلیب . بیز تورک لر بوکیتابا مباهات ایلییه رک دییه بولوروک کی بوکیتابین یازماغیندا چون موضوعلار بیز لره آچیخلاشیب و آیدینلاشیر مثال اوچون چالقی لار تاریخینده بیز تورک لر چوخ مللت لردن اوول چالقی نی انکشاف ایله میشیک دده قوروقورد بیر اوزان ( عاشیق ) نقشینده بوناغیل لاردا ظاهیر اولوب و قوپوزنو ( سازینی ) چالیب دئمه لی قوپوز اول زامان اوچ تئللی بیر ساز اولموش کی سونرالار اونون تئل لری آرتیریب و هر تئلینه بیر آد آدلانیب نتیجه توتوروق کی اوخوماق و چالماق میلادی ایلینین اونونجوعصر لرینده کلاسیک شکلینده تورک لرده بیر یاخشی باخشیلا ایزله نیردی هر کیسمه ایسته سه بو مورد ده تدقیق ایله سین باشا دوشرکی بیز تورک لر اون لار قرن بوندان اوول سازیله و آوازیله تانیشلیقیمیز واریدی و اون قرن بوندان اوول دده قورقورد کیتابینده بو موضوع آیدینلاشیب حال بو کی یازما و پوزمادان دا حتما نئچه قرن لر اونجه بو طوری مسایل واریمیش کی بو کیتاب اون قرن بوندان قاباق اونو ثبته یئتیریب . سر بسته سوی ( شعر آزاد ) کی سند لره گوره مرحوم نیما یوشیج دن قاباق بیر رفعت آدلی تبریز شاعرین توسطیله یارانیب دده قورقود کیتابیندا آیین – شایین یازیلیب و بو شعرین تاریخین قاباقا آپارماغینه تاریخ باخیشیندا دلالتی واردیر دئمک دده قورقودون سویله دیگی شعرلر قوپوزون ردیف لرینده سربست شعرله ریمیش کی ایندی اثباتا یئتیشیب و یا همان زمانلارکی شیعه لر اوز هویت لرین نشان ویرمگدن ظاللیم حاکیم لرین قورخوسوندان ابا ائدیر دیلر دده قورقورد کیتابیندا چوخ واضح راق امام حسین ( ع ) ین قاتلی یزیدی نفرین ائده رک اونون عائله سینین شهادتیندن و اسارتیندن خبر یازیلیب . کلاسیک ناغیل فخر ایلن دییه بیله ریک کی اونونجو عصرده تورک لرین طرفیندن بیر محکم سندتکین دده قورقورد کیتابیندا ثبته یئتیشیب و یازیلیب یعنی اولا بیلر کی چوخ اوندان اوللر کلاسیک ناغیل دیل دن و سینه دن سینه یه گه لمیش امما یازیلماسی یاخشی بیر محکم سند دیر کی مایه افتیخار ساییلیر دده قورقورد کیتتابینین یازماقینه گوره
انسان گرکدیر انسان لیقین – جومورودلیگین – منلیگین هیچ شرایط ده ألدن ویرمه سین و جانین ائل لرینین – وطنینین – دینینین- امکدااشلارینین ، یولوندا و اوغروندا فدا ایله سین کیمسه یه زور دئمه سین کیمسه دن ده زور قبول ایله مه سین کافیرلرینن قارشی دوروب اونلاری اسلام اوغرونه گه تیرسین یادا اونلاری یئرین اوزوندن گوتورسون دده قورقورد کیتابینین قوجامان داهی قوچاقلاری وطن اوغروندا جاندان کئچه رک بیزلره جومورودلوق- پهلوانلیک درسی اویره دیبلر و اوزان قوپوزو چالا چالا ایله دوزگون اویودلار و یوللار گوسته ریبدیر کی جسارت له نظیری یوخدور دده قورقوردون پهلوانلاری بیر گورکئملی داهی انسانین یعنی دده قورقوردون اویودلارین اوره کدن آلیب عمل ائدیبلر دده قورقورد ناغیل لاریندا سای سیز یاشاییش درسی بیزلره یئتیشیب کی هامیسی ضمن اوکی مایۀ مباهات تورک لردی یاشاییشین قورتولوشونه تکین انسانلارا لازم اولان یاشاییش اویودلاریدی و چوخلوسای سیز مباهاتلی موضوعلار بو کیتابدا یازیلیبدیر اگر مین لر خروار کیتابلاردا اونا ایضاح یازیلااونون حقی ادا اولا بیلمز و حقیر کی بیر مبتدی چوخراق ده گیلم بوقیسا ایضاحلارا اکتفا ایلییب بویوک استادلارین هر گونه انتقاد و نقدی اولسا اللرین اوپوب اگر عومور اجازه ویرسه گه لن سای لاردا اونلارین نقدلریندن اوز آدلارینه استفاده ائده جه یم . انشاءالله تعالی دئمه لی یم ناغیل لار مثنوی شکلینه یازیلماقدان اونجه قیسا ایضاح لار باشلانیب تا ناغیل لارین شخصیت لری اوخوجولارا آد باخیشیندان مشخص اولسون ساغ اولون.
( دوردونجو ناغیل )
اوشون قوجااوغلو سگرگ بویو
« اوشون قوجا » ده یرلی بیر کیشی ساییلاردی ایکی اوغلو واریدی بیری بویوک «اگرگ » آدینده ، «بایندرخان » دیوانینده یاخشی یئری واریدی . دفه لر کافیر له ری باسیب « قازان خان » ین اونونده اوتوراردی . بیرگون «ترس اوزامیش » اونا دئدی : سن باش می کسدین ؟ قان می تو کدین ؟ آج می دویوردون . اونون سوزو « اگرگ » ه چوخ آغیر گه لدی . «قازان خان» دان اجازه آلیب اوچ یوز ایگیدیله کافیرلرین « آلینجا قلعه » سینه ساری یولا دوشدو آلتی یوز قره دونلو کافیر لرین آدام لارین اولدوروب قلعه نین ایچینه گیریب . آمما قلعه نین ایچینده بویوک بیر یئر دوزلمیشدی و یوزلر آو – قوش او قویونون ایچینده اوتلاییب گئچئنیر دیلر « اگرگ » قویونون ایچینه گیریب آو آولاماقا مشغول اولدو. هر طرف دن کافیر قوشونلاری قویونون آغزینی باغلادیلار «اگرگ» دوستاق اولدو ، نئچه ایل لر گئچدی « اوشون قوجا » نین کیچیک اوغلو «سگرگ » بوی آتیبدیر ده یرلی پهلوان اولوب . بیر گون بیر نفر اوغوزلاردان اونون قارداشی « اگرگ » ین کافیرلر ألینده دوستاق اولماسینی اونا دئییب . « سگرگ » آتاسی – آناسی نین یانینه گه لیب قارداشیندان سوز آچدی . اونلار قبول ایله دیلر « قازان خان »
گه لیب « اگرگ » ه توی توتدور بلکه قارداش یانیندان چیخسین ، «سگرگ» گردک اوطاقیندا قیلینج بئلینه تاخیب کافیرلره ساری یولا دوشدولار کافیرلرین ایلچی لرین اولدوردولر ، کافیر لر اونون قارشی سینه چیخیبلر اونلاردان چوخون جهنمه واصل ائدیب .
قارداشی دوشه ن قویویه یئتیشیبدی اوردا چوخ آغلادی قویویه چوخ گیلیله نیب . «تکور » ون قوشونون اولدوره – اولدوره گئدیب هر واقت آللهی یاداسالیب حضرت محمد (ص) ه صلوات یولاییب . کافیرلر گیدیب لر « اگرگ» ی قویودان چیخارتیبلار دئییب لار: بیر کافیر جاوان گه لیب اگر اونو اولدورسن سنی آزاد ایله ییب ، کافیر قیزلاردان سنه خاتون ایله ییب ، قلعه نیندن بویوکو اولاجاقسان . « اگرگ » قبول ایله ییب «سگرگ » ین قارشی سینده دوروب ایکی قارداش هیچ بیری او بیریسی نه أل قوزاماییب اوزلری ده اوز ایش لریندن معطل قالیبلار « اگرگ » ایله « سگرگ » بیر بیره رجز اوخویوبلار ایکیسی ده الله آدین گه تیریب بیر بیری تانیییبلر اوپوشور کن ، کافیرلره حمله ائدیبلر قلعه نی آلیبلار ، اوغوزا دونوبلر دده قورقورد گه لیب قوپوز چالیب شادلیق ایله ییب .
اوشون قوجا اوغلو سگرگ بویو
دده قورقورد یازیب گوزل بیر بوی دان
آصلان لار توریین یالنیز جا سوی دان
اوغوز محالیندا «اوشون قوجا » بگ
ایگید اوغلو اولموش آدی دا «اگرگ »
دیوان دا ایشله ییر «بایندرخان » ا
قورخورسوندان گه لیب کافیرلر جانا
«قازان خان»سویله ییب «اگرگ» تک تک دیر
اغوزلارا ایگید بویوک اورنک دیر
دیوان دا چالیشیر گئدیر هر یانا
آتینی چاپدیریر گیریر میدانا
مدام آتین چاپیپ دولانیر گه زیر
یول دان چیخانلارین بوینونو اه زیر
آتینی میننده کیمسه توتان ماز
دوزگون سوزدئمک دن هیچ واقت اوتان ماز
آغوزلار دئییر لر «اگرگ » ایگیددیر
بگ لرده دئییر لر بیزه اومید دیر
یئکه داشلار یومورقوندا گیزله نیر
کافیر اونو گوروب سیز- سیز سیزله نیر
چوله چیخان زامان چولو ، چوپاندان
باش ائییللر اونا قافلان ، آصلان دان
قورولموشدو بیرگون مجلیس شاد لیقدان
یئمک ، ایچک بوللو اولوب دادلیقدان
مجلیسده دئییبدیر اونا بیر کیشی :
اولماز ایگید کیمسه ارکئک یا دیشی
مگر کی اوکه سه ، باشلار کافیر دان
گورجک اونو اه سه باشلار کافیردان
«اگرگ» دئیب : بوایش هنر ده گیل هیچ
هیچ هیچینه دوروب اوزگه لری بیچ
کیشی دئدی : ایید گر باش که سمی یه
قورخوسوندان کافر أ سیم أ سمی یه
آتلار قاویب دوشمن یوردون باسمی یا
دشمن باشین که سیب اونو آسمی یا
اول اولماز ایگید هیچ فقط یالان دیر
اؤلوب گئده ر قالماز آدی تالان دیر
«اگرگ » ده ، گه میریب دوداقین یییب
باشدان باشا گئییم ده میرده ن گئییب
گه لیب دوروب «قازان » خانین اونونده
باش آشاغا ایکن ألی قوینوندا
دئییب : اذین ویرسن یازی یازاجام !
کافیرین کوکسینه یازی یازاجام !
سونرا دئییب : فدا اولوم شوکه تن
ائل ایچینده چوخلو – چوخلو حورمه تن
«قازان » رخصت ویریب ایگید اوغلانا
اوچ یوز آتلی دولوب شمشیر قالخانا
چوخ گئدیب چاتیبلار « گوگجه دنیزه »
یاناشیبلر اونلار گوزل کهریزه
«آلینجا قلعه » سی نئچه قدم ده
کافیر لار اولاللار مودام عدم ده
« قره تکور» ملعون اونو آزدیریب
ایللر دیر کی بویوک قویو قازدیریب
قویو ایچره بوللو آولاغاز اولو
چوخ یئکه دیر امما واردیر بیر یولو
لشگر گیریب تاپسین خبر بورادان
بولمه ییر نه لروار اولار سوردان
لشکر گئدیب قویو ایچره دولانیر
آیدین بولاق ایندی ناسیل بولانیر ؟
بیرده ن گوروبدولر قاپی باغلاندی
اوچ یوز ایگید اوردا دوستاق ساخلاندی
سونرا اوخلار گه لیب قویو ایچینه
ایگیدلر قالیبلار بویله بیچینه
هامی اولوب «اگرگ » یالنیز قالیبدیر
ناراحت کن باشین داشا چالیبدیر
امما خبر آتی یئهین چاپیبدیر
سوزلری آغیزدان آغزا سالیبدیر
چای لار آخیب سولار گئدیب دوم دورو
چانقیل داشلار سویا هی قارشی دورو
داغ لار آشیب سوزلر گئدیب یئتیشیب
بوسوزلری محال بوتون ائشیدیب
شیون ائدیب اوغلو أولن قوجالدی
بالام وای ناله سی گویه اوجالدی
«اگرگ » ین قارداشی اولاردی اوشاق
بولموردو دانیشماق بولموردو گولماق
یئکه لیب اولوبدور او داغلار کیمین
اوجا بویلو جاوان او باغلار کیمین
اولوب یاواش یاواش أره ن اوغوزدا
باخلانلار دئییرلر: اولار سویوزدا
ائشیدیبدیر « اگرگ» اولار زندانی
امما بیلمیر اولار بونون جان جانی
بیرگون دویوشوبن بیرین ووروبدور
چوخ ووروبدور اونو یامان یوروبدور
اوغلان دئییب : قاییت اوتان بهادیر !
بیر سوزدئییم سنه زَهَر و بادیر !
ایگید اولسان اگر اوزون تاپارسان!
قارداشین دوستاق دی سن چیخادار سان!
«اگرگ » ین قارداشی «سگرگ » سسله نیب
اییب ایچیب یاتیب یامان بسله نیب
گه لیبدیر آجیراق یئتیشیب ائوه
گوره ن دئییر گه لیب قارشی بیر دئوه
دئییب آتاسینا : هانی قارداشیم ؟
تا اولسونو منه دوزگون یولداشیم !
سونگونو سوخوجام جانیما ایندی !
گه لمه سین اوزگه سی یانیما ایندی !
«اوشون »دئیب : «سگرگ » قربان بویوا!
مین ده وه لر آزدیر بالا تویووا!
یانلیش ائشیدمیسن یوخدور قارداشین
من اولارام سنه دوزگون سرّداشین
ایندی اون بئش ایلدیر «اگرگ » توتولوب
اونون نسلی بالا ایندی قورتولوب
هیچ نسبتی یوخدور بیزیم ائل لره
فقط آدی گه لر ائل ده دیل لره
«سگرگ » دئیب : آتا یانلیش دگیل سوز
مندن ده یوم گینان آتا داها گوز !
دوزدئمه سن دنیز ایچره بوغوللام
گئدیب ده رین قویو تاپیب سوخوللام
آتا دئییب : اوغول گه ل سن ائشیت سوز:
فرق ایتمز کی اولا یانلیش یادا دوز !
دنیا ایچره وار دیر تکجه بیر اوغلوم
ایسته رم اونومده ائده سیر اوغلوم
گئده ک صاباح بالا سنه توی توتاق
شنلیگه باشلییاق غم لری آتاق
«سگرگ » دئییب : آتا گه لمه ز قراریم
کاش قازیلا منیم ایندی مزاریم
آتا منه دوزون سویله گئده جام !
سیلاح دا اولماسا بویله گئده جام !
آتا آغلار گوزله دئیب بالایه :
منی سالما بالا بو قدر بلایه !
«سگرگ » قانیب ایشی بوسوزدوز اولموش
قارداشینه آنا هوروکلر یولموش
دئیب : آتا منده قویوب گئده جام!
غربت ائلده حقی من یاد ائده جام !
قارداشیمی تاپیب با هم گه له ریک
نامردلر اوره کین با هم ده له ریک
آنا بولوب سوزو گه لیب شیونه
دئیب : قربان اولوم اوغول من سنه !
ایشیق دنیام اولار سن سیز قارانلیق
سن گئدسن ایچه ریم دولار دومانلیق
قلبیمده قالاجاق اوغول حسرتین
گئجه گوندوز چه کدیم سنین زحمتین
گئدسه نی عزیزیم سینه آچاجام
داغا داشا قویوب اوغول قاچاجام
چوخلو بالا منده حسرت قالمیشام
قارداشین اییی نی سندن آلمیشام !
سنده گئدر اولسان منه نه قالدی ؟
نه ائتمیشدیم فلک آیریلیق سالدی ؟
«سگرگ » دئیب : آنا بوبیر رسومدور
گئدیقیم یوللاردا جئغیرراق قومدور
دعا ایله آنا منه تانری دان !
تانری اوچون ایله آه و زاری دان !
آنا سن لن آتام منیم گوزوم سیز
دیللرده قاچمیان هر آن سوزوم سیز
حلال ائدین منی بوگون گئده جام !
ائلیمده ن او بامدان وداع ائده جام !
سونرا گئدیب «سگرگ » خانین یانینه
اونو آند ویریب «اگرگ» جانینه
اذین آلیب گئدسین چوللره ساری
آپارسین ایلقاری گه تیر سین یاری
بیر توی توتوبدولار چوخ بیربویوک توی
چاغیرلانیب بگ لر آدلانیب دیر بوی
گئجه اولوب «سگرگ » گردک اوطاق دا
قیزده دایانیب دیر کنج بوجاقدا
یاتماق چاقی «سگرگ» قویوب قیلینجی
اورتالیقا سونرا آلیب بالینجی
قیز سویله ییب : «سگرگ» بونه بدعت دیر ؟
یوخسا سیزلرده بوبوجور عادت دیر ؟
«سگرگ » دئییب : سنی سئویب آلمیشام !
سندن اوتری بوگون بوردا قالمیشام !
امما گئده جاغام بویوک ایشه من
بو ایشی گوره جام منیم کی سن سن
واراجاغام صاباح داغا داشا من
شاید دولدوراسان گوزو یاشاسن
گه ل مه سم بیر ایل جه گوزل دایان سن !
گه لمه سم بیر ایل ده اوخلانمیشام من
قارداشیم گئدیب دیر اوزاق اولکه یه
گیدم گرگ منده یاناق اولکه یه
قیز دئیب : «سگرگ » باخ سن وصاله !
ائتمیشیم نه قدر من آه و ناله !
یئنی گه لین سئوه ر گردک اوطاقین
نئجه صونا سئوه ر دور و بولاقین
سن گئدسن منیم ده آهیم اوجالار
آتاآنان سنین تیزراق قوجالار
«سگرگ » دئیب : علاج یوخدور واراجام
آصلانلاری قوووب یولدا یوراجام
کندیم گووه نه رم مادام اوزومه
قویمییاجام کیرپیک گه له گوزومه
سحر اولوب «سگرگ » یولا دوشوبدور
آنا یولارینا سوزلر قوشوبدور
اوچ گون یول گئدیبدیر چاتیب قلعه یه
قویونو گوررکن گه لیب ناله یه
گوروب آلتی نفر ایلخی چی آتلی
نگهبانلیق ائدیر قول لار قووتلی
هر آلتی سین توتوب بیرده اولدوروب
جنده ک لرین قویو ایچره دولدوروب
خبر چاتیب «تکور » ائوین یئخیلدی
اوغلانی گوره ن لر کنجه سئخیلدی
«تکور یولا سالیب آلتیمش نفر تیز
اوغلانی اولدوره قالمییه دای توز
«سگرگ » یاتمیشیدی آتی کیشنه دی
یوخو اوچون کیشنه یامان دشنه دی
دوروب ووروب قیلینج هامیسی اولدو
جندک لری اوسته قان دولو دولدو
خبر چاتیب «تکور» فیکیر قیلیبدیر
یوزسیلاح لی عسگر تیز گوندریبدیر
«سگرگ » یوزونیده اولدوروب آنجاق
ده ری لرین باشدان سویدوروب آنجاق
«تکور» فرمان ویریب اوچ یوز ایگیده
«سگرگ » ی اولدوروب صونرا قاییده
اونلار دایانیبلار آیاق گئدمه ییب
«تکور» ون سوزونو قبول ائتمه ییب
«تکور» ییغیب ایندی هاممی بگ لرین
بویوک آدام لارین بویوک سگ لرین
تابیر فیکیر چه که بو آصلان نه دیر ؟
ایندی قانیر مسلمان – ایمان نه دیر !
فیکیر – فیکیر هامی دئییب : او دوستاق !
ایشینده اولمییا اگر فیریلداق !
توتار بو ایگیدی ایپه آسار او
تک تکینه یوز بویله سین باسار او
سونرا واریب زندان ایچره دئییبلر :
«اگرگ» یورولماسین سن تک غریب لر
چاره سیزیک سنه اومود سالمیشیق
آشماسان دویونو یازیق قالمیشیق !
«اگرگ » دئییب : آچین منیم قولومو
بیرده به شیم تاپیم ساغی سولومو
بیر دویونجا دویوم ایچیم ائییمدن
پولاد خنجرده میر گئییم گئییمدن
او اوغلانی توتوم قولون باغلییام !
آچیق گوزله یور دوما من آغلییام
«تکور» فرمان ویریب «اگرگ » آچیلدی
شاقیلداییب زنجیر یئره ساچیلدی
اوندان سونرا وئریب اونا بیر گئییم
ایچمه بوللو هر نه سئور او یئییم
سونرا دئییب : «اگرگ» منی باغیشلا!
بیلیرسن کی دولو گه لر یاغیشلا !
گئد اوغلانی توتوب قولون باغلاسن!
باش وزیر ائده جام سنی «اگرگ»من
«اگرگ» چیخاری کن قلعه دن باخیب
اود آلو اوره کین یاندیریب یاخیب
اوچ یوز آتلی اونا یاردیمجی اولوب
هامیسی ده میردن سیلاحا دولوب
«اگرگ » دئییب : چوخ تیز اونو باغلایام
ویردیگیم ایلقاری کندیم ساخلایام
سونرا سوروب آتین اونا یئتیشدی
ایگید بیر اوغلانا گوزو ساتاشدی
گوروب یاتیب اوغلان آی کیمین دیراو
قاشلاری کمان دیر یای کیمین دیر او
یاخینلاشیب گوروب وار دیر قوپوزو
قوپوز نشان ویریر ائل دان اوغوزو
گوتوروب قوپوزو باسیب سینه یه
اوچ سیمیله سوزلر گه لیب سینه یه
دئییب : ایگید اویان یاتما امان دیر !
ایگید اوچون یاتماق اؤلومدور قان دیر !
یوخسا گه لر ایندی «تکور» قوشونو
اولدورر لر سنی جانین اوشونو
«سگرگ » دوروب گوروب بیری ساز چالیر
بایاتی دان چالیر اهدیناز چالیر
سویله ییب : ای آدام سازین اولماسا؟
سازی گر چالماسان گوزوم دولماسا ؟
دوروب سنی منده یئره بیچه جام !
قانین توکوب جاما اوزوم ایچه جام !
«اگرگ » دئییب بالا کیمین قولوسان؟
هانسی باغچالارین گوزل گولوسان ؟
آه : ده یرلی ایگید هاردا یئرین وار ؟
گورمه میسن داغلار اوستونده سن قار ؟
« سگرگ » دئییب : اوغوز اوغلو اوغوزام
کافیر قانی اوچون چوخلو سوسوزام
بیر ایشه گه لمیشم ایشی قورتارام
قلعه لری سوکوب یئره سورتارام
«اگرگ » دئییب ائلین نه دیر آدین نه ؟
آنان آتان نه دیر . سویله دادین نه ؟
« سگرگ » دئییب : بونونه چون سورورسان ؟
بو ایشینده ن منی یامان یورورسان
اوغوز ائللی « اوشون قوجا » آتام دیر
حیالی بیر قادین منیم آنام دیر
« اگرگ» آدلی واردیر منیم قارداشیم
چه کمز اوقدر اودا اولار یولداشیم
آدیم اولار « سگرگ » اوغوز ائلینده
ایگیدلیقیم از بر ائلین دیلینده
گه لمیشم تاوارام قلعه سیندیرام
کافیر لرین تختین یئره آندیرام
قارداشیمی آلیب اونو گوتوروم
اوندان سونرا دنیا مالین اوتوروم
«اگرگ » دئییب منم سنین قارداشین
ایندی اولدوم سنین داداش !سرّداشین !
قربان اولوم سنین تکین جاوانا !
منیم دیلیم ازبر ائده ن بیانا
ایکی قارداش با هم چوخ آغلاییب لار
بیر بیرینی قوش تکین یاغلاییب لار
سونرا وئریبدیلر اونلار أل اله
حمله سالیب دیلار اودم قلعه یه
کافیر لری تیغه سالیب بیچیبلر
کافیر قانینی ده سوتک ایچیبلر
گئری دونوب دولار سونرا ائلینه
سوقایتتماز آخار گئدر سئلینه
پیشواز ائدیب اوغوز بگی اونلاردان
دده قورقورد ناغیل یازیب بونلاردان
